Parabéns á comunidade educativa do Daviña Rey

Dende Anova felicitamos á comunidade educativa do IES Daviña Rey por conseguir parar os recortes no seu centro, mantendo ESO e o Bach no curso que vén. 

A rápida, calada e eficaz labor da ANPA e a mobilización do alumnado - do que debemos aprender - conseguiron facer retroceder á Xunta. 

Dende Anova estamos satisfeitos porque o interese común deixara fóra os personalismos dos que se fai gala en demasiadas ocasións na política actual.

Anova apoia as mobilizacións contra o peche de ESO e Bach no IES Daviña Rey

Anova apoia a mobilización do alumnado e dos seus pais e nais en contra a retirada da ESO e do Bacharelato do IES Daviña Rey.

O Centro de Ensinanza Secundaria Daviña Rey é un centro público, cunha posición céntrica e que está a realizar unha boa labor pedagóxica. Se a cuestión fose o aforro, a Consellería de Educación debería priorizar os servizos nos centros públicos antes que os concertos de ensino secundario.

A posible decisión de suprimir de golpe, xa para o vindeiro curso, a ESO e o Bacharelato no IES Daviña Rey enmárcase nunha política de desmantelamento do Ensino Público por parte do goberno do PP que, en cambio, mantén os concertos coa privada.

ANOVA – MONFORTE DE LEMOS

Anova felicita á sociedade pola manifestación a prol da área sanitaria

Anova felicita á sociedade das comarcas da zona sur de Lugo pola lección de dignidade amosada na masiva manifestación en defensa da área sanitaria de Monforte.

Rexeitamos os intentos do PP de deslexitimar a mobilización, pois os dereitos só se conseguiron con loita e presión por parte da maioría social. A mobilización do sábado non foi inútil, e o PP de Galiza e do sur de Lugo saben que teñen diante á maioría da sociedade en contra dos plans de xerencia sanitaria integrada en Lugo. Neste sentido, as declaracións a Radio Principal Ser Monforte por parte da voceira do PP en Monforte, Julia Rodríguez, parécennos indignantes, pois califica de “algarada” a mobilización e amosa un descoñecemento da realidade galega, ao dicir que no resto de Galiza non hai mobilizacións en contra da xestión provincial, cando na propia zona da Mariña o xerente - cargo do PPdG - dimitiu en contra deste decreto de xestión provincial e está habendo unha intensa mobilización, así como manifestacións contra a privatización e perda de servizos sanitarios por toda Galiza. Ademais, Julia Rodríguez acusa de manipulación ás persoas e colectivos promotores da mobilización, o que nos parece intolerábel.

A cidadanía non se mobiliza enganada, sabe perfectamente que o modelo sanitario do PP, o dos recortes e a privatización, ensaiado en Valencia e Madrid e iniciado en Galiza: perda da calidade asistencial. No caso da xestión sanitaria provincial, a cidadanía de Monforte e comarcas sabe que este modelo resultou lesivo no hospital do Barco – similar en características ao de Monforte – cando se aplicou na provincia de Ourense o modelo de xestión provincial, tal e como se nos explicou á cidadanía nunhas charlas organizadas pola Plataforma Sanitaria.

Seguiremos apoiando toda mobilización e auto-organización da sociedade no que respecta á defensa da Sanidade Pública e a mellora desta.

Monforte e comarca sae á rúa en defensa do Hospital e da área sanitaria.

Foto de Radio Principal Ser Monforte.

Monforte foi hoxe (16-3-2013) un clamor contra o decreto de xestión sanitaria integrada. A cidadanía dunha das comarcas máis envellecidas de Galiza saíu, de novo, como en 2010, masivamente á rúa amosando o rexeitamento a que o Hospital Comarcal e a súa área sanitaria dependan da xerencia de Lugo. Este sistema de xestión sanitaria provincial amosou, por exemplo, no hospital do Barco, de similares características ao de Monforte, un aumento de listas de espera e perda de servizos. Recortes á maioría social e privatización dos bens públicos como a Sanidade para beneficio dos poucos, esa é a política do PP de Galiza. Monforte e comarca volven dicir NON aos plans de Feijóo. En 2010, a mobilización conseguiu parar o decreto de xestión provincial e Feijóo prometera que Monforte ía a seguir sendo área sanitaria. Agora, o Presidente decide se sigue cos plans de integración e falta á súa palabra ou se, por unha vez, escoita á cidadanía.

Contra o Decreto de Xestión Integrada: Monforte, área sanitaria.

Monforte de Lemos, 25 de febreiro de 2013. A creación do hospital comarcal de Monforte, hai 26 anos, coincidindo coa creación da área sanitaria acollida ao mapa sanitario galego, supuxo unha mellora sustancial da atención sanitaria da comarca, beneficiándose unhas 60.000 persoas e 11 concellos, a maior parte deles cunha taxa de envellecemento e de dispersión das máis altas de Galiza.

Desde que a mediados do ano 2010 a Conselleria de sanidade anunciase a elaboración do xa Decreto de Xestión Integrada, a preocupación na comarca foi evidente, tanto para moitas organizacións políticas, sindicais, de profesionais da sanidade e cidadáns que se deron conta de que este decreto vai suponer unha merma na calidade e nos servizos sanitarios dos que agora desfrutamos.

Unha xerencia ubicada na cidade de Lugo, como pretende o decreto, siñifica:

1.- Unha dificultade para o acceso á mesma tanto pola distancia como polo descoñecemento de moitos problemas e eivas cotiás que xurden nos centros da actual área sanitaria.

2.- Unha disminución nos investimentos previstos, tanto nos centros de saúde como no propio hospital, xa o estamos a ver, a cantidade orzamentada polo Goberno da Xunta para este ano 2013 no hospital en inversión directa ascende a pouco máis de 17.000 euros. [Alternativa Galega de Esquerda presentou unha emenda aos orzamentos da Xunta para 2013 para aumentar esta partida ata os 60.000 €].

3.- Se falta persoal sanitario no Hospital de Lugo poderá optarse por persoal do hospital de Monforte polo que este déficit ocasionará un aumento das listas de espera, a dereivación de pacientes a Lugo, producindo perda de servizos e polo tanto o seu lento desmantelamento.

Se este decreto se pon en marcha na provincia de Lugo, non é máis que outro incumprimento do Goberno Galego encabezado por Feijóo que nesta ocasión vai moito máis alá, xa que empeñou a súa palabra cando prometu que Monforte non se ía a ver afectado por dito decreto. Anova Irmandade Nacionalista sorprenderíase se Feijóo cumplise a palabra dada, pois tamén ía rematar co paro en 45 días.

Anova quere, en primeiro lugar, amosar o seu apoio á cidadanía en todas aquelas mobilizacións, reclamacións e reivindicacións que se vaian levar a cabo para evitar o desmantelamento dos servizos sanitarios públicos comarcais así como amosar o apoio á Plataforma en Defensa da Sanidade Pública en todas as iniciativas, actividades e actos relacionados con dito problema.

ANOVA - LUGO-SUR

Anova pide refacer o PXOM de Monforte por non adaptarse á realidade da cidade..

Á Corporación Municipal de Monforte de Lemos en Pleno.

EXPOSICIÓN DE MOTIVOS

O Plan Xeral de Urbanismo é unha necesidade evidente e necesaria para Monforte de Lemos.

Nas diversas xuntanzas previas dos grupos municipais [segundo as súas propias manifestacións públicas] co equipo redactor marcáranse certas pautas entre as que estaban que se respectasen os volumes de edificación existentes, partindo así da realidade urbanística de Monforte.

Causounos sorpresa que o equipo redactor non tivera en conta esta demanda e a aprobación do documento por parte da Corporación Municipal, a sabendas de que non se adapta á realidade urbanística, que non é algo que pertenza a un goberno nin a unha corporación concreta, senón que é froito dun proceso histórico, para ben ou para mal.

Se continúa o proceso de alegacións, a aceptación ou non destas quedaría a criterio do equipo redactor e entraríamos na fase de aprobación definitiva do PXOM por parte da Xunta, pero o Plan Xeral non volvería a estar en exposición pública, polo que se lle negaría aos veciños e veciñas a posibilidade de ver reflectidas as súas inquedanzas no documento e sancionaría un modelo de cidade que non parte da realidade actual.

Por todo isto, Anova de Lemos SOLICITAMOS:

- Que se anule o acordo de aprobación inicial e de exposición pública do PXOM, devolvendo o proxecto ao equipo redactor para que se refaga no plazo de 6 meses tendo en conta a realidade urbanística de Monforte.

Nacionalistas de Chantada apelan á mobilización cidadá contra a corrución política.

Apoio ás reivindicacións de afectad@s polas preferentes: devolución 100% dos aforros.

AnovA do Sur de Lugo apoia plenamente a reivindicación das plataformas de afectados polas preferentes de Galiza de esixir a devolución do 100% dos cartos ás persoas afectadas por participacións preferentes e obrigas subordinadas.

Dende a plataforma de afectados de Lugo pedíusenos apoio aos grupos municipais da comarca para presentar mocións nos concellos de apoio á súa reivindicación, que AnovA apoia plenamente. En Sober rexistrouse hoxe mesmo, xoves, 24 de xaneiro, a través da concelleira non adscrita Paula Vázquez Verao, a moción facilitada pola plataforma para o seu debate no pleno da mesma tarde debate no pleno ordinario do xoves, 31 de xaneiro.

Dende AnovA, apoiamos a recén creada plataforma de afectados polas preferentes no sur de Lugo e colaboraremos na difusión desta estafa entre a cidadanía da nosa comarca. Así mesmo, apoiamos a manifestación que se celebrará en Santiago o 2 de febreiro.

As participacións preferentes e obrigas subordinadas foron un engano dos bancos á cidadanía aforradora, mediante o cal se fixeron cos aforros da xente para cadrar os seus balances: mediante estes produtos, as persoas aforradoras pasaron de ser depositarios a accionistas. As 78.000 persoas afectadas por estes produtos bancarios merecen ser tratadas como aforradores e non como inversores. Así, Alternativa Galega de Esqueda ten dito, a través do voceiro Xosé Manuel Beiras, que a “quita” para os afectados deste produtos é un roubo, que merecen recuperar o 100% dos seus aforros, pois son vítimas dunha estafa por parte das directivas dos bancos e das extintas caixas galegas, estafa coñecida polo Banco de España. A quita – que pode chegar ao 50% dos cartos – significa que as persoas afectadas van pagar as perdas da banca cos seus aforros.

Na maioría dos casos, as persoas con preferentes e subordinadas non saben que contrataron un produto de alto risco; de feito, calcúlase que hai unhas 30.000 persoas afectadas que non saben que o están.

Esta situación actual das caixas e o perigo destes produtos financeiros xa fora advertida por Xosé Manuel Beiras no Parlamento de Galiza en 1995. O mes pasado, o voceiro de AGE exortou aos xuíces de instrucción e aos ministerios fiscais das audiencias a exercer as súas competencias para proceder a investigar todos e cada un dos casos, contratos, as condicións de abuso, confianza e engano que se empregaron, e entrevistarse coas vítimas desta estafa para recadar os indicios de actuación delictiva e evitar que os cidadáns fiquen en estado de indefensión tal e como está a acontecer na actualidade, o que supón unha nova violación da Constitución.

AnovA – Asembleas de AnovA do Sur de Lugo

Valoración dos Orzamentos da Xunta para 2013.

Os Orzamentos da Xunta para 2013 están ao servizo das grandes finanzas, priorizando o pago da débeda, e contra a maioría social, recortando en servizos básicos. Para a nosa comarca, o recorte dun 66% en transferencias aos concellos vai repercutir moi negativamente na asistencia social que se poida prestar nunha comarca tan envellecida. O Hospital de Monforte, en inversión directa, recibe a irrisoria cantidade de 17.500 €

[ORZAMENTOS 2013, instrumento perxudicial para a cidadanía e ao servizo dos poderes financeiros] 

Para Anova, o Proxecto de Lei de Orzamentos da C. A. de Galiza para 2013 reflexan unha clara tendencia, non de aforro, senón de roubo ás clases máis indefensas economicamente para ter liquidez coa que pagar a débeda bancaria que foi asumida como débeda pública, débeda que case que se duplicou dende que goberna Feijóo. Esta política orzamentaria restrictiva, de recortes e máis recortes, agudiza o grave proceso de recesión no que estamos inmersos.

 Da demouca non se libra nada. Se o 'recorte' global dos orzamentos suma uns 655 millóns, o do ensino e a sanidade ascende a uns 290, case a metade (44%) do total.  O gasto orzamentario en vivenda cae na metade (45%). Os orzamentos redúcense en Cultura – xa con poucos recursos - nunha cuarta parte (24%). As transferencias aos concellos para atender os servizos sociais redúcenselles en dous terzos (66%). Mentras se dispara o paro (case 280.000 persoas desempregadas en Galiza) o orzamento para promoción do emprego, no conxunto dos oito programas nos que se veiculiza, redúcese nun 41%: a intermediación laboral nun 62%; o fomento da ocupación nun 68%; os servizos de emprego nun 86%; a promoción estrita nun 52% e elimínanse as prazas de orientadores laborais.

  
Unha das premisas que deben reflectir uns orzamentos é o proxecto político do grupo de goberno, uns orzamentos deben mostrar como un grupo que sustenta un goberno inviste os seus recursos económicos. Pois ben, o grupo de goberno do PP na Xunta goberna para as grandes finanzas – prioriza o pago da débeda – e contra a maioría social – recortando nos servizos básicos.

 

[ORZAMENTOS 2013, insuficientes para unha das comarcas máis envellecidas de Galiza]

Para a nosa comarca, o recorte dun 66% en transferencias aos concellos vai repercutir moi negativamente na asistencia social que se poida prestar nunha comarca tan envellecida coma a nosa.

No conxunto das terras lemavas, chantadinas e quiroguesas, hai localidades onde as inversións reais previstas nin sequera se poden calificar de esmola: concellos como os de, Quiroga, Ribas do Sil, Courel ou Pobra de Brollón reciben só 12.473 euros para a rede proximal de camiños. O Saviñao, Bóveda, Pantón ou Sober, por este mesmo concepto reciben 21.411 euros para repartir entre eles.

No tocante a infraestruturas básicas, o que máis precisamos é a rede de saneamento, algo que só se satisface no concello de Pantón, cos máis de 470.000 euros para a rede de saneamento en Tuiriz, algo que agardamos se extenda aos numeros núcleos que aínda carecen deste servizo básico na nosa comarca.

Investimentos en Chantada pouca cousa por non decir nada, ningunha infraestrutura en concreto, ningunha inversión produtiva: pouco máis de 22.000 euros para a rede de camiños para Taboada, Carballedo e Chantada, 60.000 euros para reparación ou en proceso de reparación de vivendas de promoción pública e pouco máis de 8.900 euros para a gran aposta da Xunta en Benestar para o programa de teleasistencia para os concellos de Taboada Chantada e Carballedo.

Orzaméntase 1 millón de euros para a rehabilitación do casco histórico, un investimento que ten como finalidade dar axudas a aquelas persoas que decidan rehabilitar as súas vivendas. Ogallá se leve a cabo nos tempos que corren, pero non o vemos moi factible.

En canto ao tan ¨cacareado¨ investimento do Porto Seco de Monforte, a Xunta inviste de fondos propios uns 106.000 euros, cando se sabe que a conexión entre a N-120 e o Porto Seco costa máis de 10 millóns de euros. Estamos a falar que esta infraestrutura verá a luz, se non pasa nada, cara ao 2016, e nun contexto de recesión poida que, desgraciadamente, non chegue a tempo para servir á dinamización económica de toda a comarca.

Os servizos sanitarios da comarcan non se libran da dinámica xeral de recortes. O Hospital de Monforte, en inversión directa, recibe a irrisoria cantidade de 17.500 €. Se temos en conta, como ten denunciado a Plataforma Sanitaria, que hai un gran gasto en calefacción por culpa de non ter un bo illamento térmico, estes 17.500 € soan escasísimos e parécennos que non garanten que se vaia apostar polo funcionamento de Monforte como área de xestión única da zona sur de Lugo, condenándonos a non ter recursos propios para o bo funcionamento do servizos sanitarios. Planea a sospeita da redución de servizos en todo o sistema sanitario galego.

[A ALTERNATIVA DE AGE]

O grupo parlamentario de Alternativa Galega de Esquerda, coalición na que participa Anova, presentou unha emenda á totalidade, no tocante á política fiscal, que perpitiría contar con case 600 millóns de euros máis, destinados a financiar sanidade, educación, servizos sociais ou políticas de medio ambiente.

Dende Anova, pedimos unha maior inversión directa no Hospital de Monforte, apostar por esta infraestrutura sanitaria en serio, garantindo o serivizo sanitario para 60.000 persoas como área de xestión única.

Dende Anova no sur de Lugo, impulsaremos unha campaña informativa sobre estes orzamentos antisociais da Xunta de Galiza.

Servizos de Hemodinámica, Radioterapia e Medicina Nuclear para o HULA.

Na mañá deste domingo, 20 de xaneiro, en Lugo, AnovA apoiou a concentración cívica que colectivos cidadáns de Lugo convocaron para esixir os prometidos servizos de Hemodinámica, Radioterapia e Medicina Nuclear no HULA.

Dende que se abriu o novo hospital, en novembro de 2010, aumentaron aínda máis as listas de agarda, hai camas pechadas e privatizáronse os servizos de limpeza, vixianza e seguridade, lavandeiría, informática e mantemento. Todo isto redunda na perda de calidade asistencial.

Ademais, o HULA carece aínda hoxe dos servizos - prometidos por Feijóo - de Hemodinámica, Radioterapia e Medicina Nuclear, para os cales se derivan os pacientes á Coruña. A atención dos pacientes de cardio é peor na provincia de Lugo cá noutras zonas de Galiza, cun tempo de espera, de media, de máis de 170 mitutos, unha situación precaria que se agrava polo envellecemento de numerosas comarcas da provincia de Lugo.