Alternativa Galega de Esquerda reclama a dimisión dun conselleiro de Educación que recibiu 16 sentenzas contra as súas políticas

AGE pediu a dimisión do conselleiro de Educación, cuxas políticas de destrución do ensino público recibiron 16 sentenzas en contra dende 2009. As dúas máis recentes chegaron nos últimos días: a sentenza do Xulgado do Contencioso Administrativo nº2 de Compostela, que anula o concurso de traslado do profesorado, e a do Tribunal Supremo, que anula as subvencións a centros que segregan por xénero.

Ramón Vázquez subliñou que a sentenza do Supremo veu recoñecer o carácter anticonstitucional dunhas axudas que, ademais, vulneran a lei orgánica de Igualdade, do mesmo rango, insistiu, que a lei Wert á que se acolle o conselleiro para manter unhas subvencións que xa prohibira o Tribunal Superior de Xustiza de Galicia (TSXG) en 2013. “O conselleiro é un delincuente reincidente, para eludir a sentenza do TSXG retirou os concertos nestes centros só nos primeiros ciclos e mantívoos no resto de ciclos”, dixo Vázquez. Estes cinco colexios que segregan por sexo e con vinculacións co Opus Dei atenden a 1.500 alumnos e reciben 3 millóns de euros públicos cada ano dende 2009.

Non hai argumentos pedagóxicos que sosteñan a segregación nas aulas. A política da consellería responde só a motivacións ideolóxicas na procura reaccionaria dun ensino católico. “Nestes anos os alumnos matriculados en relixión baixaron un 40%, pero os recursos que se destinan á área mantéñense”, dixo Ramón Vázquez. AGE denuncia as prácticas autoritarias dun conselleiro que actúa á marxe da lei, acurralado polos xuíces e que non representa a unha comunidade educativa á que está enfrontado dende case o inicio do seu mandato. 

Recortes de profesorado e respecto á legalidade no conservatorio de Compostela 

Abondando na denuncia destas prácticas, o deputado de AGE, Xabier Ron, explicou que a Consellería de Educación está chamando neste mes de xullo a distintos centros para anunciar que lles recortará o profesorado, sen deixar marxe de reacción ás direccións dos centros e sen facelo público para evitar a protesta da comunidade educativa.

Tamén AGE rexistrou unha iniciativa parlamentaria para que se restitúa a legalidade democrática no Conservatorio de Música de Santiago e se respecten os acordos do claustro, do consello escolar e da inspección que elixiron candidata para dirixir a institución. O conselleiro de Educación pasou por riba destes acordos e impuxo a dedo a un candidato menos votado pero que lle é politicamente afín.

Estas son as 16 sentenzas:

 1) 2009. Tribunal Superior Xustiza de Galicia 

Sentenza contra a prohibición de actos informativos e divulgativos nos centros

2) 2010. Contencioso Administrativo nº 2 Compostela Sentenza contra a ampliación do horario lectivo do profesorado das EOI

3) 2011. Contencioso Administrativo nº 2 Compostela Sentenza contra as restricións no emprego do comedor escolar polo profesorado

4) 2011. Contencioso Administrativo nº 2 Vigo
Sentenza contra os recortes Salariais xubilación anticipada

5) 2011. Xulgado nº 2 de Ourense
Sentenza contra o cese do director da residencia docente de Ourense

6) 2011. Tribunal Superior Xustiza de Galicia
Sentenza vacacións profesorado meses lectivos

7) 2012. Contencioso Administrativo nº 2 Ourense
Sentenza contra a sanción do director do IES de CEE por denunciar recortes no centro

8) 2012. Tribunal Superior Xustiza de Galicia
Sentenza contra o Decreto do Plurilingüísmo

9) 2013. Tribunal Superior Xustiza de Galicia
Sentenza contra a supresión da Licenciatura de Físicas en Ourense

10) 2013. Tribunal Superior Xustiza de Galicia
Sentenza contra o recorte salarial a profesorado de baixa por intervención cirúrxica

11) 2013. Tribunal Superior Xustiza de Galicia
Sentenza anulación subvencións centro segregadores

12) 2013. Contencioso Administrativo Pontevedra
Sentenza paga extraordinaria persoal docente non universitario

13) 2013.Tribunal Superior Xustiza de Galicia
Sentenza paga extraordinaria PDI universidade

14) 2014.Tribunal Superior Xustiza de Galicia
Sentenza recoñecemento médico profesorado

15) 2014. Contencioso Administrativo nº 2 Compostela Sentencia anulación concurso traslados profesorado

16) 2014.Tribunal Supremo
Sentenza anulación subvencións centro segregadores

Contra a supresión de axudas para o alumnado de FP que realiza Formación en Centros de Traballo

O DOG do 19 de maio publicou a orde de axudas para o 2014 do alumnado de FP que realiza a Formación en Centros de Traballo (FCT).
O des-goberno da Xunta non só reduce a cuantía global das axudas nun 16%(de 720.000 € en 2013 a 606.982,83 €) senón que suprime axudas ao alumnado respecto das do curso pasado. 

As axudas xa eran insignificantes e agora mesmo se lles quitan a determinado alumnado.

Mentres que no 2014 o alumnado que realizaba a FCT no mesmo concello do seu domicilio ou do centro educativo cobraba 75 € de axuda, agora, non percibe nada.

Se unha persoa cursa estudos nun centro de FP dun concello e raliza a FCT nun centro de traballo nese mesmo concello, non recibiría axuda ningunha, aínda residindo noutro concello e tendo que desprazarse. 

Reclamamos unha alternativa para os mozos e mozas con necesidades educativas especiais ao rematar o período de escolaridade na comarca de Monforte

Onte acompañamos ao deputado Ramón Vázquez nunha xuntanza con pais e nais da ANPA do CEE Infanta Elena, na que aprendimos moito de xente con tanta dignidade que loita por algo xusto: que os mozos e mozas  conten, ao saír do centro Infanta Elena con alternativas para continuar avanzando na súa inserción laboral e social.

Anova do sur de Lugo apoia as reivindicacións dos pais e nais do colexio de educación especial Infanta Elena de Monforte e poñémonos a disposición da ANPA no que poidamos colaborar. Toda a sociedade debe implicarse nesta reivindicación.

AGE reclama unha alternativa para os mozos e mozas con necesidades educativas especiais ao rematar o período de escolaridade na comarca de Monforte

* O deputado Ramón Vázquez mantivo unha xuntanza coa ANPA do CEE Infanta Elena na que se puxo de manifesto os problemas aos que se enfrontan as familias ao non dispor de ningunha alternativa que permita aos seus fillos e fillas avanzar na súa inserción social e laboral 

O deputado de Alternativa Galega de Esquerda (AGE), Ramón Vázquez, amosou o apoio do seu grupo parlamentar as demandas da ANPA do colexio de educación especial Infanta Elena de Monforte durante o encontro que tivo lugar onte e no que se puxeron de manifesto os problemas aos que se enfrontan as familias destes rapaces e rapazas unha vez remata o seu período de escolarización aos 21 anos ao non contar con ningunha alternativa para continuar avanzando na inserción social e laboral dos seus fillos e fillas.

Alternativa Galega de Esquerda únese así as demandas dos pais e nais deste centro que reclaman que a Xunta de Galicia asegure a inserción social e laboral destes mozos e mozas nesta comarca creando un centro de continuidade, centro de día, talleres ocupacionais, obradoiros de emprego ou calquera outra solución que ofreza unha alternativa ao illamento das persoas con necesidades educativas especiais nos seus fogares ante a falta de saídas. 

O ensino público a debate: charla-coloquio en Monforte: 7 de novembro

Anova quere contribuír ao debate sobre o ensino público:

- que está a pasar coa privatización?

- que atoparemos as mozas e mozos ao chegar á Universidade?

- está en perigo o modelo público de ensino?

Destas e doutras cuestións falaremos con dous representantes de dúas facetas da comunidade educativa: ensinante e alumno.

Acompañarannos Xosé Manuel Castro González, mestre de Filosofía e Historia no ensino medio, e Xosé Miguel Diéguez Rodríguez, estudante membro da Delegación de Alumn@s de Ciencias Xurídicas da UVIGO.

O debate será o xoves ás 20:15 h en Monforte, na Casa da Cultura.

Anova apoia as manifestacións contra a LOMCE

Dende Anova, reafirmamos o noso compromiso co ensino público, universal, de calidade e gratuíto. Porque sen igualdade de condicións de acceso ao ensino non hai igualdade real nin hai liberdade de pensamento.

Lembramos que para ANOVA a LOMCE (Ley Orgánica de Mejora de la Calidad Educativa) supón unha regresión de décadas no ensino público: unha lei inxusta, sexista, centralista e antidemocrática.

Esta aberración en forma de lei, elaborada sen consenso coa comunidade educativa, supón:

• Desmantelamento do ensino público de calidade mediante un proceso de mercantilización do mesmo.
• Segregación do alumnado, comezando pola segregación económica que supón a non gratuidade do ensino infantil, e a segregación sexista, por permitir os concertos educativos con centros que segregan por sexo. A posibilidade de “dereito de admisión” dos centros educativos, coa chamada “liberdade de elección de centro”, creará centos de primeira e de segunda en canto a recursos e calidade do ensino, fomentando ademais o ensino privado.
• Modelo competitivo, coa reintrodución das reválidas, que a partir de 6º serán realizadas por “especialistas externos ao centro”, o que fomenta a privatización do ensino.
• Eliminación da democracia na organización da comunidade educativa, transferindo competencias do Consello Escolar – que ficaría agora cun mero carácter consultivo – á Dirección.
• En lugar de traballar contra as causas do fracaso escolar, créanse rutas de saída disimulada das mozas e mozos “fracasadas” do sistema con vías como a da “FP básica”.
• Elitización do ensino superior, con maiores trabas para o acceso a este, tanto académicas coma económicas (suba de taxas…).
• Españolización –reducindo a carga lectiva do galego, que non é troncal, como é o castelán ou o inglés– e centralismo.
• Adoutrinamento reaccionario. Relixión como materia máis importante en rango que o galego e a filosofía e eliminación de materias que fomentan o pensamento crítico (Ciencias do Mundo Contemporáneo, Educación para a Cidadanía…).
• Intento de introducir “coñecementos financeiros” no ensino, conforme a unha estratexia deseñada pola OCDE.

O deterioro do ensino público enmárcase nun proceso xeral de desmantelamento do “Estado do Benestar” e privatización dos bens e servizos públicos que arranca nos anos 70, proceso hoxe agravado coa aplicvación desta lei.

Dende Anova, reafirmamos o noso compromiso co ensino público, universal, de calidade e gratuíto. Porque sen igualdade de condicións de acceso ao ensino non hai igualdade real nin hai liberdade de pensamento. Ensino público é, polo tanto, democracia real.

Paremos a LOMCE! Paremos a expulsión das maiorías sociais do sistema educativo público!

Parabéns á comunidade educativa do Daviña Rey

Dende Anova felicitamos á comunidade educativa do IES Daviña Rey por conseguir parar os recortes no seu centro, mantendo ESO e o Bach no curso que vén. 

A rápida, calada e eficaz labor da ANPA e a mobilización do alumnado - do que debemos aprender - conseguiron facer retroceder á Xunta. 

Dende Anova estamos satisfeitos porque o interese común deixara fóra os personalismos dos que se fai gala en demasiadas ocasións na política actual.

Anova apoia as mobilizacións contra o peche de ESO e Bach no IES Daviña Rey

Anova apoia a mobilización do alumnado e dos seus pais e nais en contra a retirada da ESO e do Bacharelato do IES Daviña Rey.

O Centro de Ensinanza Secundaria Daviña Rey é un centro público, cunha posición céntrica e que está a realizar unha boa labor pedagóxica. Se a cuestión fose o aforro, a Consellería de Educación debería priorizar os servizos nos centros públicos antes que os concertos de ensino secundario.

A posible decisión de suprimir de golpe, xa para o vindeiro curso, a ESO e o Bacharelato no IES Daviña Rey enmárcase nunha política de desmantelamento do Ensino Público por parte do goberno do PP que, en cambio, mantén os concertos coa privada.

ANOVA – MONFORTE DE LEMOS