Apoio á ILP a prol da Sanidade Pública, promovida por SOS Sanidade Pública.


Anova – Irmandade Nacionalista apoia a Iniciativa Lexislativa Popular (ILP) promovida pola Plataforma SOS Sanidade Pública para deter a política de recortes e privatizacións da Sanidade Pública Galega (impulsada polo o actual Goberno Galego), para garantir o dereito constitucional á nosa saúde.

A Proposición de Lei, que se debate mañá, 18 de decembro, no Parlamento galego pretende a xestión pública directa dos centros sanitarios, a potenciación da Atención Primaria e a promoción da saúde como alternativa á crise e as áreas sanitarias como espazo para a planificación e a xestión dos recursos. 

Dende as asembleas de Anova do sur de Lugo apoiamos a ILP de SOS Sanidade Pública e a concentración cidadá diante diante do Parlamento (mañá ás 10 horas) para amosaer o apoio social á mesma.

Puntos da ILP:

1.- A defensa do carácter público da sanidade como garantía do dereito á Saúde de todos os galegos.
2.- A xestión pública e directa dos servizos sanitarios e o rexeitamento ás formas de financiamento e xestión privada introducidas pola Xunta de Galiza.
3.- A necesidade de incrementar a capacidade resolutiva da Atención Primaria mellorando os seus recursos e o acceso ás tecnoloxías diagnósticas, como base dun sistema sanitario accesible, equitativo e eficiente.
4.- Mantemento do modelo descentralizado do sistema sanitario galego a través das áreas sanitarias, como espazos para a planificación, asignación e xestión integral dos recursos en base ás necesidades sanitarias da poboación e coa súa participación activa.

ANOVA – SUR DE LUGO

Concentración en defensa dos postos de traballo no Parador de Monforte.

Anova do Sur de Lugo unímonos á protesta, xunto co deputado por Lugo de Alternativa Galega de Esquerda, Ramón Vázquez Díaz.

A concentración tivo lugar diante do Parador de Turismo de Monforte, pola defensa dos postos de traballo e contra o ERE que a empresa, Paradores do Estado, ten previsto aplicar nos establecementos de todo o Estado. 

O ERE anunciado prevé despedimentos, peche de instalacións e reducións horarias, como o caso de Monforte, no que se pretende pechar o parador durante 7 meses ao ano.

Dende Anova, consideramos que este é un golpe para o sector turístico dunha comarca economicamente deprimida e apoiamos a loita de traballadores e traballadoras do Parador de Monforte. 


A xornada de protesta enmárcase dentro do calendario de mobilizacións previsto en toda a rede de Paradores do Estado, que inclúe dúas xornadas de folga e concentracións en todo pais nos días de hoxe e maña día 8 de Decembro.

O grupo parlamentario de Alternativa Galega de Esquerda defende a viabilidade dos Paradores e o seu carácter Público, considerando o ERE unha manobra máis para a privatización de todos os bens públicos do Estado.

Paradores despide traballador@s e pecha paradores.

O Parador de Monforte verase afectado pola medida

 
O grupo parlamentario de Alternativa Galega de Esquerda presentou unha interpelación sobre o previsto peche dos paradores de Ferrol e Verín e o peche parcial dos de Santo Estevo, Tui, Monforte e Vilaba, así coma os despedimentos de traballadores e traballadoras nos de Baiona, Cambados, Pontevedra e Compostela, o que supón un novo golpe ao emprego e a dinamización económica de áreas significativas de Galiza que xa se atopan inmersas en moi graves dificultades económicas.

O grupo de Alternativa Galega de Esquerda esixe á Xunta de Galiza que asuma unha posición de defensa dos postos de traballo e dos nosos intereses sociais e económicos. Por iso, presentouse unha interpelación na que se pide a valoración da Xunta diante deste anuncio e información sobre o coñecemento previo que tiña dos peches e despedimentos anunciados, así como saber cales son as medidas que pensa adoptar o goberno da Xunta de Galiza en orde de evitar a destrución de postos de traballo e as subseguintes perdas económicas que se seguen no ámbito económico.

Anova propón aos concellos crear regulamentos de axudas de emerxencia social.

Anova do Sur de Lugo propón aos concellos a creación de regulamentos de axudas de emerxencia social. 
Trátase de dar resposta dende os concellos, a administración máis próxima á cidadanía, á grave situación social que vivimos.

Tomado de: ytumas.wordpress.com
En Galiza estanse a producir uns 17 desafiuzamentos ao día, un drama, o das execucións hipotecarias, con responsabilidades políticas: as administracións públicas desenvolveron unha lexislación que só promoveu o acceso á vivenda en réxime de propiedade, marxinando outros xeitos de acceso á vivenda como o aluguer ou a desgravación fiscal por compra. Engadindo a inestabilidade e inseguridade dos inquilinos ante a lei de arrendamentos urbáns, a desregularización do mercado hipotecario que permite hipotecas a 50 anos, a inexistencia dun parque público de alugueiro e a falla de control e restricción sobre o crédito, empurrou a milleiros de persoas a endebedarse.


Se a este problema dos desafiuzamentos lle engadimos outras medidas adoptadas pola Xunta de Galiza, como son, a redución severa dos orzamentos sanitarios, a concesión da xestión sanitaria a mans privadas, unha imposición de copagamentos, a externalización progresiva de diversos servizos e actividades, ou as restricións no acceso aos servizos sanitarios, o problema para a cidadanía agrávase poñendo en risco o seu futuro: estamos nun momento de involución social e con numerosos colectivos sociais en risco de exclusión.



A proximidade da Administración local coa cidadanía obriga aos servizos sociais comunitarios a tentar dar unha resposta o máis rápida e eficaz posíbel para resolver situacións carenciais que é necesario cubrir.



Por esta razón, Anova do Sur de Lugo, propón nos Concellos aumentar a cobertura social coa elaboración de regulamentos de emerxencia social, que inclúan medidas relacionadas cos problemas de uso e mantemento da vivenda, tales como o aloxamento temporal ante emerxencias ou sinistros, desfiuzamentos e situacións familiares moi graves, así como a cobertura dos gastos sanitarios cando a situación o requira. Tamén, asesoramento legal aos afectados, programas de mediación cos bancos para renegociar hipotecas ou alugueiros sociais, ademáis de que o Concello retire os depósitos e créditos de bancos que desahucien a persoas negando dende o goberno municipal a colaboración da policía local nos procesos de desahucios das familias do Concello.



En Monforte, onde Anova apoia as iniciativas contra os desafiuzamentos que as forzas políticas están a impulsar, a moción será remitida a todos os grupos da corporación municipal.

Moción Emerxencia Social_

Anova apoia a folga xeral do 14N: paramos para paralos!



Anova-Irmandade Nacionalista apoia a convocatoria de folga xeral para o día 14 de novembro e participará activamente nas mobilizacións.

Anova do sur de Lugo participará na manifestación de Monforte, que sae ás 19:30 horas da praza de España, e anima a toda a cidadanía a manifestarse contra os recurtes en sanidade e educación, contra os desafiuzamentos e contra o sometemento dos estados aos ditados dos mercados, que empobrecen á maioría social. A xornada de folga é extensiva a toda Europa, porque outra Europa é posíbel, unha Europa social e dos pobos.

Anova-Irmandade Nacionalista
Sur de Lugo

asembleadelemos@gmail.com

Contra a suba das taxas xudiciais.


Anova-Irmandade Nacionalista rexeita a suba das taxas xudiciais, que supoñen que a Xustiza deixe de ser universal, excluíndo dela a quen non pode afrontar o seu custo.

Anova do Sur de Lugo participou na concentración contra as taxas xudiciais que tivo lugar o 9 de novembro en Monforte, diante dos xulgados, contra as taxas xudiciais.

Emma Rodríguez Blanco, voceira de Anova-Lemos.

Comunicado de Anova sobre as eleccións.

Anova valora como un grande acerto a decisión de ter feito un chamado a todas as forza nacionalistas e de esquerda para a conformación da unidade de acción para o Parlamento Galego, e que deu como resultado unha coalición con EU, Equo e Espazo Ecosocialista, e un Grupo Parlamentar comprometido, como di o seu programa, na "Liberación nacional e social de Galiza", en "avanzar no exercicio da autodeterminación ... reivindicando a nación dos galegos e galegas como suxeito único da soberanía nacional", que defenderá os intereses da maioría social e servirá de altofalante ás voces da rúa na cámara galega.

Reunida hoxe en Santiago de Compostela a Coordinadora Nacional de ANOVA para avaliar o proceso electoral e os resultados das Eleccións Autonómicas do 21 de Outubro, acordou facer público o que segue:

1. Agradecer á cidadanía galega o seu apoio masivo, a ilusión e a confianza depositada na coalición Alternativa Galega de Esquerda, que se configura así como oposición xenuína ao desgoberno do PP.

2. Felicitar publicamente a Xosé Manuel Beiras polo seu magnífico labor de campaña desenvolvido e por saber representar e concitar co seu discurso os anceios de rebeldía dunha parte moi importante da cidadanía.

3. Facer mención expresa do labor realizado pola militancia de ANOVA e do conxunto de simpatizantes que colaboraron voluntariamente en levar a bo porto esta campaña, salientado a magnífica actividade dos mesmos nas redes sociais.

4. Valorar como excelentes o resultado electoral da nosa coalición malia que o descenso de máis de 500.000 votos das tres forzas presentes até agora no Parlamento Galego deu a maioría ao PP aparentando en escanos un avanzo que non tivo na sociedade.

5. Valorar como un grande acerto a decisión de ter feito un chamado a todas as forza nacionalistas e de esquerda para a conformación da unidade de acción para o Parlamento Galego, e que deu como resultado unha coalición con EU, Equo e Espazo Ecosocialista, e un Grupo Parlamentar comprometido como di o seu programa na "Liberación nacional e social de Galiza", en "avanzar no exercicio da autodeterminación ... reivindicando a nación dos galegos e galegas como suxeito único da soberanía nacional", que defenderá os intereses da maioría social e servirá de altofalante ás voces da rúa na cámara galega.

Noutra orde de cousas, acordouse tamén a posta en marcha do traballo de consolidación e organización de ANOVA acordado na súa asemblea constituínte do 14 de xullo, e adiado pola convocatoria electoral, que deberá estar rematado no mes de xaneiro e como estaba previsto desembocará nunha Asemblea Nacional da nova organización nacionalista de esquerda.

A Coordinadora Nacional acordou tamén neste encontro apoiar a folga xeral do vindeiro 14 de novembro.

Por último, ANOVA quere felicitar e solidarizarse co Fiscal Xeral de Galiza, o señor Varela, polas súas declaracións nas que criticou os recortes sociais e denunciou a blindaxe dos mercados e a actitude dos gobernos que priorizan o "mundo dos negocios" fronte as persoas.

Galiza a 27 de outubro de 2012

Participa o 14 de xullo na constitución dun novo proxecto en común da nación galega.

Participa na Asemblea Nacional Constituínte dun novo proxecto en común para Galiza o 14 de xullo en Santiago de Compostela.
Incríbete antes do 11 de xullo ás 00:00 horas na túa asemblea ou a través da web, onde tamén podes descargar os documentos e regulamento da asemblea.

Conferencia de Xosé Manuel Beiras: "construíndo a ferramenta política que Galiza precisa".

Conferencia "Estamos en obras: construíndo a ferramenta política que Galiza precisa". Xosé Manuel Beiras Torrado.

Venres, 29 de xuño, ás 20:30 horas.

Casa da Cultura de Monforte de Lemos.

Reunión de coordinación de Asembleas.

Foto: NPC Val Miñor.

[Esta é unha proposta que temos que debatir nas distintas asembleas antes do 16 de xuño].

Representantes de 43 asembleas por un Novo Proxecto Común, entre asembleas locais e comarcais de todo o País, concordaron hoxe en facer público o seguinte manifesto enviado aos medios de comunicación por Antonio Araúxo Quintas da Asemblea Nacionalista de Val Miñor.

O manifesto e outras propostas someteranse ás asembleas locais que ademais poderán elixir quen os ha representar na Coordinadora Provisoria de Asembleas que se reunirá o sábado día 16 para, entre outras cousas, fixar o día da Asemblea Nacional Constituínte que se prevé celebrar no prazo aproximado dun mes.

MANIFESTO
Foto: NPC Val Miñor.

POÑENDO OS ALICERCES

As persoas que en representación das asembleas locais ou comarcais, constituídas ou en fase de constitución, por un Novo Proxecto Común, integradas por persoas a título individual e que acollen unha pluralidade de visións da nación dos galegos/as reunidas o 2 de xuño en réxime de autoconvocatoria

MANIFESTAMOS

1º. - A nosa vontade de traballar pola creación dunha nova organización de carácter asembleario, aberto e plural, de integración individual e organización territorial, con vocación de continuidade na acción social, de carácter nacionalista, expresión política do galeguismo, e enmarcada tanto na tradición plural da esquerda como nas novas expresións da mesma.

2º. - A nosa vontade de establecer unha coordinación entre as distintas asembleas comarcais ou locais a fin de preparar unha reunión asemblearia de carácter nacional.

3º. - A nosa vontade de participar en futuras convocatorias electorais.

Teo 2 de xuño de 2012

Tendendo pontes dende os concellos

As decisións importantes non se adoptan por capricho. Teñen a súa razón de ser. A ruptura da que era a casa común do nacionalismo, o BNG, produciuse en toda Galiza coa marcha de dúas das tres sensibilidades que daban razón de ser á fronte nacionalista, o Encontro Irmandiño e Máis Galiza. Un feito desta transcendencia tivo tamén consecuencias en moitos concellos do país.
Ducias de concelleiros e concelleiras próximos a estas sensibilidades ou dende a independencia decidimos iniciar un novo camiño coa esperanza de asentar modelos municipais participativos, abertos, comprometidos e orgullosos de seu. Nestes tempos nos que todos renuncian pola política de recortes do Partido Popular, nós non renunciamos. Non renunciamos a esixir plans de conciliación, políticas sociais activas, apoio aos nosos sectores produtivos locais, prestixiadas programacións culturais, melloras das nosas infraestruturas e  servizos básicos, axuda ás actividades dos nosos tecidos asociativos e defensa das prestacións educativas e sanitarias dos nosos concellos. Por principios, non renunciamos.

Mantendo o máximo respecto para cos que até o de agora foron os nosos compañeiros e compañeiras, optamos por iniciar colectivamente un novo camiño que remate na construción a nivel nacional dun novo referente político. Un camiño propio, diferente, que aposte por novas maneiras de relacionarse entre nós e a sociedade e que teña vocación de ser unha ferramenta útil para facer fronte aos retos do futuro do noso  país.

Somos conscientes da grande responsabilidade que aceptamos no momento no que fomos escollidos pola veciñanza para ser os seus representantes nos diferentes concellos. Somos conscientes de que esta responsabilidade é maior coa tarefa colectiva que temos por diante. Sentimos que temos o deber ético  de seguir representando aos veciños e veciñas que confiaron en nós nas pasadas eleccións municipais. Foi con eles, cos que realmente adquirimos este compromiso firme de defender as propostas coas que fomos elixidos, de escoitalos e de solucionarlles os problemas que xurdan durante todo este mandato.

Dende os nosos Concellos, facendo país gran a gran queremos gañar o futuro. Novas maneiras , novas  formas de exercer a política e o convencemento de que é unha maioría social agredida a que precisa desta aposta colectiva de todos e todas nós.

Cacheiras (Teo), 26 de maio do 2012

Asinan, representantes dos Concellos de: Mondariz - Val do Dubra - Teo - Ribadumia - Catoira - Outes - Lousame - Ames - Manzaneda - Toén - Gondomar - Cuntis - Beariz - Cee - Agolada - Bergondo - Carballedo - Bueu - Chantada - Alfoz - Maceda - Muros - Portomarín - Antas de Ulla - Sober - As Pontes